PEMALI

nyang namanyah pemali atawa pantangan di Bekasi mah bejibun dah. Mulain dari nyang ora boleh jejanggit, bocah wadon ora boleh njegir di depan pintu, gegrawakan sembarangan ampe nyogroh nasi nyang lagi digares ora boleh di sangga. Blon lagih kalu ada laki-bini nyang lagih makan bedua, trusah si bini ora bisa nemenin lakinyah makan, eh ngapah kudu sapu nyang di taro di bangku sebelah lakinyah ya? Nurut penjabaran ilmiahnya mah katanya biar ora ada wadon laen nyang duduk nemenin ntuh si laki.

http://3.bp.blogspot.com/-qW0W9RT4aaE/TwaV7RpZAUI/AAAAAAAAAD8/BBvTsX2hqIM/s1600/pamali-761019.jpeg

Nyatanyah emang ampir di tiep gutekan nyang ada di Bekasi, bentuk pemali atawa pantangan emang macem-macem. Tengok ge dah, nyang di bla Elor ama di bla Kidul rada beda. Kalu nyang di bla Elor banyakan jenis pantanganah emang rada deket ama bau-bau laut, jadinyah kalu ada nyang mo blayar nyari ikan kudu sedekah dulu, ngirimin sajen nyang diapungin ke aer ampe neneb ke tengah laut.
Beda ama nyang di bla Kidul nyang banyakan pu’unannya. Mengkanyah kalu di bla Kidul, zaman ganu mah masing banyak ancak nyang nggantung di pu’unan. Cumenan tetep ge nyang diuntungin mah, bocah bader nyang emang suka nyolongin sajen atawa ancak nyang baru di taro. Sengkilang buat nyomot sajen apa ancak kudu make ritual jalan jingklik biar bisa duluan nguyup aer klapa muda daripada dedemit.
Kalu mo lebih danta lagih, dulu mah ampir di tiep rumah mesrakat lokal selain punya pangkeng, udah pasti dilengkepin ama pendaringanah. Nah, di pendaringan ntuh sering ditaroin ancak ama pendupaan nyang dibakarin menyan atawa stanggi, ora tau dah maksudah apah. Cumenan kalu mo ditlusurin,nyang beginian udah kaya ritual ajah. Jadi kaya kebiasaan nyang dijalanin karna buyut, engkong, uwa atawa nyang laennya juga njalanin tradisi kaya begonoh.

Cumenan mangkin kemarih, ntuh tradisi kaya udah mulain ditinggalin. Selain udah banyak nyang paham ama agama, juga ada nyang bilang pan karang mah aroma menyan udah kalah wangi ama aroma parfum nyang didagangin eceran di ampir tiep pengkolan. Jadinya ninggal disemprot ge ntuh pangkeng ama pendaringan udah wangi kaga ketulungan. Ora make ngumpulin kembang tujuh rupa nyang nyomot dari kebon orang. Tapian kalu ngomongin pemali mah emang ora ada abisah. Maren ge misalah, ada bocah Bekasi nyang kalu ngliet ilmunyah mah udah ora keukur dah. Pan kolanyah ge jauh bangat ampe ke Eropah, eh ngapah giliran nglewatin pu’unan gede nyang numbuh di bantian jalan, mudu mbunyiin klakson ama bilang numpang-numpang.
Murunan nyang kaya begini mah ora bisa diilangin kali ya, nyang namanyah kearifan lokal. Sengkilang mesrakatnya udah pada maju, gelar ama ilmunya udah pada bererot. Tetep ge adat, tradisi ama nyang laen-laenah masing trus ada. Dipaksa atawa ora dipaksa, suka atawa ora, semuanyah masing pada betahan. Kalu ora bisa dijagain lengkep, paling kaga srimpilanah mah ada, abong ge ampe tandes pisan. Cumenan, kita mah paling ge bisanya cumen ngarep supaya nyang tetep betahan mah, tradisi nyang ora banyak nyimpangah. Et, jadi apa bae!

Oman aBDuL rOChman

Mungkin Anda Menyukai

Tinggalkan Balasan

Alamat email Anda tidak akan dipublikasikan. Ruas yang wajib ditandai *

This blog is kept spam free by WP-SpamFree.